រាជធានីភ្នំពេញ ៖ នៅព្រឹកថ្ងៃទី១០ កញ្ញា អាជ្ញាធររាជធានីភ្នំពេញ បានកោះប្រជុំមួយជាមួយអាជីវករដែលជាម្ចាស់អាជីវកម្មលក់ប្រេងហ្គាស និងឧស្ម័ននៅរាជធានីភ្នំពេញ ក្នុងបំណងដើម្បីគ្រប់គ្រងច្បាប់ផង និងតម្រូវឱ្យមានការរៀបចំបង្ការ និងបញ្ជៀសហានីភ័យនានាផងដែរ ។ កិច្ចប្រជុំនោះ នៅសាលារាជធានីភ្នំពេញស្ថិតក្រោមអធិបតីលោកប៉ា សុជាតិវង្ស អភិបាលរាជធានីភ្នំពេញ និងលោកហូ វិចិត្រ អនុប្រធានអាជ្ញាធរប្រេងកាតជាតិកម្ពុជា ដោយមានការចូលរួមពីមន្ត្រីជំនាញមកពីអាជ្ញាធរប្រេងកាតជាតិកម្ពុជា មន្ត្រីមកពីមន្ទីរពាក់ព័ន្ធ និងអភិបាលខណ្ឌទាំង៩និងម្ចាស់អាជីវកម្មលក់ប្រេង ហ្គាស និងឧស្ម័នជាច្រើនរូបទៀត ។ លោកបា៉ សុជាតិវង្ស អភិបាលនៃគណៈអភិបាលរាជធានីភ្នំពេញបានទទួលស្គាល់ថា នៅរាជធានីភ្នំពេញពិតជាមានភាពស្មុគស្មាញទាក់ទងទៅនឹងការគ្រប់គ្រងការធ្វើអាជីវកម្មប្រេងឥន្ធនៈ និងឧស្ម័ន ក្នុងនោះស្ថានីយប្រេងឥន្ធនៈក្នុងរាជធានីភ្នំពេញ ដែលស្ថានីយខ្លះមានច្បាប់ ស្ថានីយខ្លះឥតច្បាប់ និងខ្វះការគ្រប់គ្រងតាមលក្ខណៈបច្ចេកទេស ដោយមិនទាន់រាប់បញ្ចូលកន្លែងលក់ប្រេងសាំងបែបអនាធិបតេយ្យជាច្រើនកន្លែងទៀតនោះទេ ។ លោកអភិបាលថ្លែងថា ហេតុនេះយើងត្រូវមានផែនការជាកញ្ចប់មួយដើម្បីគ្រប់គ្រងអាជីវកម្មប្រេងឥន្ធនៈ ហ្គាស និងឧស្ម័ន ទាំងការនាំចូល គ្រប់គ្រង ទុកដាក់ និងចែកចាយឱ្យត្រឹមត្រូវតាមលក្ខណៈបច្ចេកទេស ។ បើមិនដូច្នេះទេ រាជធានីភ្នំពេញនឹងប្រឈមគ្រោះអគ្គិភ័យធ្ងន់ធ្ងរ ដូចដែលធ្លាប់បានកើតឡើងរួចមកហើយដោយសារផ្ទុះហ្គាសនេះតែម្តង ។ តាមការអះអាងពីមន្ត្រីនគរបាលផ្នែកអគ្គិភ័យបានឱ្យដឹងថា ជាមធ្យមអគ្គិភ័យបានកើតឡើងនៅភ្នំពេញទាំងទ្រង់ទ្រាយតូច និងធំមានម្តងក្នុងរយៈពេល៣ថ្ងៃ ។ ជាក់ស្តែងគិតពីដើមឆ្នាំ២០១៣ មកដល់ពេលនេះគ្រោះអគ្គិភ័យបានកើតឡើងក្នុងរាជធានីភ្នំពេញចំនួន៧៦លើក សម្លាប់មនុស្ស៣នាក់ របួស១០នាក់ ខូចខាតរថយន្ត៤គ្រឿង ក្នុងនោះបណ្តាលមកពីផ្ទុះធុងហ្គាសចំនួន៣៦លើក ។ លោកបា៉ សុជាតិវង្ស មានប្រសាសន៍ទៀតថា ម្ចាស់អាជីវកម្មប្រេង និងឧស្ម័នឥន្ធនៈ៣៧១ កន្លែងនៅរាជធានីភ្នំពេញត្រូវទៅសុំច្បាប់ឱ្យត្រឹមត្រូវពីអាជ្ញាធររាជធានីភ្នំពេញ ដើម្បីបញ្ជៀសហានីភ័យ ដែលបានកើតឡើងដោយប្រការណាមួយពុំមានការទទួលខុសត្រូវ និងទទួលដឹងឮពីមន្ត្រីជំនាញនៅមូលដ្ឋាននោះ ។ ហើយអាជ្ញាធររាជធានីភ្នំពេញចាំបាច់ត្រូវតែគ្រប់គ្រងរាល់អាជីវកម្មដែលងាយរងគ្រោះជាងគេនោះ គឺអាជីវកម្ម ប្រេង ហ្គាស និងឧស្ម័នគ្រប់ប្រភេទ ។ លោកប៉ា សុជាតិវង្ស បានចាត់ទុកការងារ
គ្រប់គ្រងនេះជាអាវុធមុខពីរប្រសិនបើយើងគ្រប់គ្រងបានល្អវាមានប្រយោជន៍ដល់សង្គម តែប្រសិនបើការគ្រប់គ្រងនេះមិនបានល្អ វាទៅជាបង្កគ្រោះមហន្តរាយនិងបង្កហានីភ័យដល់សង្គមជាតិ ។ ដោយហេតុផលនេះហើយដែលចាំបាច់ត្រូវតែមានការរៀបរយឱ្យបានល្ង ។ ចំណែកឯការប្រកបអាជីវកម្មលក់សាំងដបតាមផ្ទះក៏ត្រូវមានការរៀបរយផងដែរ នៅពេលក្រោយ។ លោកបញ្ជាក់ថា អាជ្ញាធរភ្នំពេញមិនបណ្តោយឱ្យមានការលក់ប្រេងសាំងយ៉ាងអនាធិបតេយ្យនោះទេ ព្រោះដើម្បីរក្សាបាននូវសន្តិសុខ និងសុវត្ថិភាពរបស់ប្រជាពលរដ្ឋ ។ លោកប៉ា សុជាតិវង្ស បានស្នើឱ្យអាជ្ញាធរជំនាញពាក់ព័ន្ធទាំងអស់ត្រូវបំផុស និងជំរុញឱ្យដល់ម្ចាស់អាជីវកម្ម ប្រេង ហ្គាស ឧស្ម័ន គ្រប់ប្រភេទនៅរាជធានីភ្នំពេញ ពិសេសស្ថានីយប្រេង ឥន្ធនៈ ត្រូវតែមានច្បាប់ប្រកបអាជីវកម្ម គ្រប់គ្រាន់ពីអាជ្ញាធរពាក់ព័ន្ធ ហើយរាល់ស្ថានីយដែលបានសាងសង់ថ្មីនិងចាស់នោះត្រូវឱ្យស្របតាមស្តង់ដារបច្ចេកទេសឱ្យបានត្រឹមត្រូវ ដើម្បីងាយស្រួលក្នុងការគ្រប់គ្រងបង្ការហានីភ័យដែលបានកើតឡើងដោយគ្រោះអគ្គិភ័យជាយថាហេតុ ។ យោងតាមរបាយការណ៍របស់មន្ទីរឧស្សាហកម្មរ៉ែ និងថាមពលរាជធានីភ្នំពេញបានឱ្យដឹងថា នៅភ្នំពេញមានមូលដ្ឋានលក់ហ្គាស និងឧស្ម័នផ្សេងៗមានចំនួន៣៧១កន្លែង ក្នុងនោះមានច្បាប់ចំនួន១២០ប៉ុណ្ណោះ ដែលមន្ទីរបានចេញច្បាប់អនុញ្ញាតឱ្យធ្វើអាជីវកម្ម ។ ក្នុងនោះមានចំនួន៣៦មូលដ្ឋាន បានសុំច្បាប់អនុញ្ញាតទីតាំងពីសាលារាជធានីភ្នំពេញត្រឹមត្រូវ ហើយនៅមានមូលដ្ឋានអាជីវកម្មចំនួន២៥១ទៀតមិនទាន់បានសុំច្បាប់នៅឡើយទេ ។ លោកហូ វិចិត្រ អនុប្រធានអាជ្ញាធរប្រេងកាតជាតិកម្ពុជាបានបញ្ជាក់ថា ដើម្បីឱ្យដំណើរការនៃការគ្រប់គ្រងរាល់ម្ចាស់អាជីវកម្មទាំងអស់នៅរាជធានីភ្នំពេញទទួលបានជោគជ័យ វាទាល់តែមានស្ថាប័នពាក់ព័ន្ធគ្រប់ជំនាញទាំងអស់ចូលរួម ត្រួតពិនិត្យអនុវត្តឱ្យបានព្រមគ្នា ពិសេសបំផុសជំរុញឱ្យម្ចាស់អាជីវកម្មនោះសុំច្បាប់ឱ្យបានគ្រប់គ្នា និងចូលរួមអនុវត្តឱ្យបានព្រមគ្នាផងដែរ ទើបការងារនេះទទួលបានជោគជ័យទាំងអស់គ្នាស្របតាមគោលនយោបាយរបស់រាជរដ្ឋាភិបាលកម្ពុជាផងដែរ ៕
ប្រភពពី
kohsantepheap
.jpg)
